मधुमेह (Diabetes)

घरमै गर्न सकिने हेरचाह

मधुमेह राम्रोसँग नियन्त्रणमा राख्नु स्वस्थ रहनका लागि धेरै जरुरी छ। आफ्नो हेरचाह गर्न यी महत्त्वपूर्ण उपायहरू अपनाउनुस्:

स्वस्थ खाना खानुस्: सन्तुलित खानाको छनोट गर्नुस्। फलफूल, तरकारी, अन्न र कम बोसोयुक्त प्रोटिनमा ध्यान दिनुस्। मिठा पेय पदार्थ, प्याकेटका खाना र अस्वस्थ बोसोयुक्त खाना कम खाने कोसिस गर्नुस्।

सक्रिय रहनुस्: नियमित शारीरिक क्रियाकलापले शरीरलाई चिनी प्रयोग गर्न मद्दत गर्छ। हिँड्ने, साइकल चलाउने वा नाच्ने जस्ता आफूलाई मन पर्ने गतिविधिहरू गर्नुस्। कुन किसिमको र कति व्यायाम आफूलाई उपयुक्त छ भनेर आफ्नो डाक्टरसँग सल्लाह लिनुस्।

औषधि निर्देशनअनुसार खानुस्: यदि डाक्टरले मधुमेहको लागि औषधि लेखिदिनुभएको छ भने, ठीक भएको महसुस हुँदा पनि, औषधि डाक्टरको निर्देशनअनुसार नै खानु धेरै जरुरी छ।

रगतमा चिनीको मात्रा नाप्नुस्: डाक्टरले नियमित रूपमा रगतमा चिनीको मात्रा जाँच गर्न सुझाव दिन सक्नुहुन्छ। यसले तपाईं र तपाईंको डाक्टर दुवैलाई खाना, व्यायाम र औषधिले शरीरमा कस्तो असर पार्छ भनेर बुझ्न मद्दत गर्छ। यो जाँच सही तरिकाले गर्न सिक्नुस्।

नियमित स्वास्थ्य जाँच गराउनुस्: नियमित रूपमा डाक्टरकहाँ जाँच गराउन जानुस्। उहाँले मधुमेह नियन्त्रण गर्न, आवश्यक भएमा उपचार परिवर्तन गर्न र सम्बन्धित अन्य स्वास्थ्य समस्याहरू छन् कि छैनन् भनेर हेर्न मद्दत गर्नुहुन्छ।

खुट्टाको हेरचाह गर्नुस्: खुट्टामा कुनै घाउ, फोका वा पाकेको ठाउँ छ कि छैन भनेर प्रत्येक दिन जाँच गर्नुस्। खुट्टा बिस्तारै धुनुस् र सुक्खा राख्नुस्। खुट्टा जोगाउन राम्रोसँग फिट हुने आरामदायी जुत्ता वा चप्पल लगाउनुस्।

मानसिक तनावको व्यवस्थापन गर्नुस्: मानसिक तनावले रगतमा चिनीको मात्रामा असर पार्न सक्छ। आराम गर्ने तरिकाहरू अपनाउने, मनपर्ने काम गर्ने वा आफ्ना प्रियजनहरूसँग समय बिताउने जस्ता स्वस्थ उपायहरूद्वारा तनाव कम गर्ने कोसिस गर्नुस्।