टाइफाइड ज्वरो (Typhoid Fever)

घरमै गर्न सकिने हेरचाह

घरमा आफैं हेरचाह गर्ने तरिका

यदि तपाईंको डाक्टरले टाइफाइड ज्वरो भएको पुष्टि गरेको छ र घरमै निको हुन सकिने बताएको छ भने, तलका उपायहरू अपनाउँदा आराम मिल्छ र छिटो निको हुन सहयोग पुग्छ।

डाक्टरले दिएको एन्टिबायोटिक पूरा खानुहोस्

डाक्टरले दिएको एन्टिबायोटिक, बीचैमा ठीक लागे पनि ,पूरा कोर्स नसकिदा सम्म बन्द नगर्नुहोस् । बीचमा छोड्यो भने संक्रमण फेरि फर्कन सक्छ र पछि उपचार गर्न झन् गाह्रो हुन सक्छ।

जति सक्यो आराम गर्नुहोस्

शरीरले संक्रमणसँग लड्न ऊर्जा खर्च गर्छ। पूरै निको नभएसम्म आराम गर्नुहोस् र भारी काम वा कठिन शारीरिक गतिविधिबाट टाढा रहनुहोस्।

पानी र तरल पदार्थ पर्याप्त पिउनुहोस्

धेरै ज्वरो आउँदा शरीरबाट छिट्टै पानी घट्छ। दिनभर सफा र सुरक्षित पानी मनग्यै पिइरहनुहोस्। ज्वरो, पसिना वा पखालाले गुमेको पानी र नुन प्रतिस्थापन गर्न जीवनजल (ORS) पिउनुहोस् - यो फार्मेसी र स्वास्थ्य चौकीहरूमा सजिलै पाइन्छ।

ज्वरो कम गर्नुहोस्

ज्वरोले धेरै असहज भएमा, प्याकेटमा लेखिएको तरिका वा डाक्टरको सल्लाह अनुसार प्यारासिटामोल लिन सकिन्छ - यसले ज्वरो घटाउँछ र दुखाइमा पनि आराम दिन्छ। डाक्टरले नभनेसम्म आइबुप्रोफेन वा एस्पिरिन नखानुहोस्।

हल्का र सजिलोसंग पच्ने खाना खानुहोस्

ज्वरोमा भोक कम लाग्छ र पेट पनि नाजुक हुन सक्छ। भात, रोटी वा झोल जस्ता सादा खाना थोरैथोरै गरी पटकपटक खानुहोस्। पूरै निको नभएसम्म पिरो, तेलिलो खाना नखानुहोस्।

घरमा सरसफाइमा विशेष ध्यान दिनुहोस्

टाइफाइड घरका अरू सदस्यहरूमा पनि सर्न सक्छ। शौचालय गएपछि र खाना छुनुभन्दा अगाडि साबुनपानीले राम्ररी हात धुनुहोस्। सकेसम्म आफ्नो छुट्टै तौलिया प्रयोग गर्नुहोस् र शौचालय सधैं सफा राख्नुहोस्।

सुरक्षित पानी मात्र पिउनुहोस्

निको हुँदासम्म उमालेको, फिल्टर गरेको वा उपचार गरेको पानी मात्र पिउनुहोस्। धारो वा सफा नभएको स्रोतको पानी नपिउनुहोस्।

अरूका लागि खाना नपकाउनुहोस्

डाक्टरले संक्रमण सकियो भनेर नभनेसम्म अरूको लागि खाना बनाउन वा छुनबाट टाढा रहनुहोस्। यो कुरा विशेषगरी उनीहरूले ध्यान दिनुपर्छ जो खाना पकाउने काम गर्छन्, स्वास्थ्य सेवामा काम गर्छन् वा साना बच्चाहरूको हेरचाह गर्छन्।

फलोअप जाँचमा नछुटाउनुहोस्

डाक्टरले थप परीक्षण वा जाँचका लागि आउन भन्न सक्छन् - यसमा नछुटाउनुहोस्। किनभने केही मानिसहरूमा ज्वरो निको भइसकेपछि पनि ब्याक्टेरिया शरीरमा रहन सक्छ र अरूमा सर्न सक्छ।